Reviews

Mae copi braille a phrint bras o'r llyfr yma ar gael i'w fenthyg gan RNIB Cymru. Cysylltwch â Gwasanaeth Gwybodaeth Hygyrch RNIB Cymru ar 029 2045 0440 neu gwybodaethhygyrchcymru@rnib.org.uk am fwy o wybodaeth.
*Cyhoeddwr: Y Lolfa*

Mae’r gyfrol hon yn rhan o gyfres Pen Dafad – cyfres o lyfrau byrion a chyffrous ar gyfer yr arddegau. Casgliad o straeon ar destunau eitha heriol sy’n llenwi Noson boring i mewn. Er yn wahanol iawn i’w gilydd o ran arddull a chynnwys, maent oll yn edrych ar y cylch o hau a medi. Straeon trawiadol sydd yma, yn dangos gwreiddioldeb a newydd-deb. Ceir hanesion am ddial, am unigrwydd ac anobaith, am hunllefau ac am uchelgais. Straeon cyfoes ydynt, gyda sawl cyfeiriad at y we, ffonau symudol a byd yr arddegau heddiw. Byddant yn apelio at ferched a bechgyn; o’r pum stori ceir un yn unig gan ferch, ac un gyda merch yn brif gymeriad. Maent yn straeon byr iawn, sydd yn gyffrous ac yn cynnal diddordeb y darllenydd. Byddai modd eu darllen yn eitha cyflym, mewn noson efallai. Rhaid nodi bod ambell stori yn gofyn am aeddfedrwydd o du’r darllenydd, ac ambell un yn creu darlun hunllefus yn y meddwl. Eto i gyd, dyma gryfder y gyfrol – sef bod yma ddeunydd hollol newydd gyda chymeriadau credadwy y mae modd uniaethu â nhw. Yr unig feirniadaeth sydd gen i yw’r tueddiad diangen i fabwysiadu a chymreigio geiriau Saesneg. Er fy mod i’n derbyn bod terminoleg Saesneg i agweddau o’r dechnoleg newydd yn anorfod, a oes rhaid derbyn sbîd cyflym a tshecio ei e-bost? Mewn un stori yn arbennig teimlaf fod yna or-ddibyniaeth ar ebychiadau Saesneg i greu effaith a mynegi teimladau – ond wedi dweud hyn, efallai fod hyn yn rhan o‘r ddrama a geir yn y stori. Cyfrol fendigedig yw hon, un a fydd yn apelio at bobl ifanc yn eu harddegau trwy gyfrwng y themâu cyfoes, cymeriadau realistig a digwyddiadau dramatig.
*Mererid Thomas @ www.gwales.com*